نفسي اتجوز واحد مجنون
نفضل طوووول النهار نلعب بلايستيشن
بعد ما نصلي الفجر جماعة يقولي قومي اجهزي علشان ننزل نجري ع البحر براحتنا قبل ما الدنيا تبقى زحمة
يصحيني الساعة 3 الفجر يقولي يلا نلعب دور كوتشينة و اخليكي تكسبيني
لما اقوله عاوزة اروح الملاهي يقولي خلينا يوم في نص الاسبوع علشان تكون فاضية و نلعب براحتنا
اصحيه الساعة 4 الفجر اقوله انا عاوزة شيبسي بالجبنة المتبلة .. يقوم يبرق و يزعقلي كده و يقولي جبنة متبلة ايه اللي الساعة 4 الفجر دي يا هانم ما انتي عارفة اني بحبه بالكباب
لما يرجع من الشغل يجيبلي كيس بلونات كبييير كده و منفاخ و نفضل ننفخهم كلهم و بعدها نفرقعهم كلهم بردو
يوم اجازته يقعد يقرا في المصحف و انا اقرا وراه و لما يخلص يقولي عاوز ناخد الثواب مع بعض اصلي مش عاوز ادخل الجنة من غيرك و عاوزك انتي تكوني حور العين ليا باذن الله
يجيبلي كورة و نقعد نلعب بيها في البيت و لو حاجة اتكسرت و انا بشوط الكورة يقولي فداكي مليون زيها المهم انك جيبتي جون
و انا بغسله هدومه الاقي فيها شوكولاتة و ورقة مكتوب عليها "انا جايبلك دي و بالبندق اهيه بس يا رب ما تروح وسط الغسيل"
عارفة انه حلم .. بس لو لقيته هفضل ليل نهار افكر ازاي اكون زوجة صالحة له و في كل سجدة هدعي ربنا يقدرني و اعرف اسعده
